Бразилын ерөнхийлөгч Лула да Силва дайнтай байгаа Орос, Украины хооронд энхийн хэлэлцээ эхлүүлэхийг АНУ болон Европын холбоонд уриаллаа. Бразилын ерөнхийлөгч БНХАУ-д хийсэн айлчлалынхаа үеэр Хятадын даргатай хийсэн гурван цаг гаруй болсон уулзалт дээрээ уг уриалгыг хэлсэн юм. АНУ-ыг Украинд дайн өдөөхөө болихыг Лула да Силва уриалахын хажуугаар Вашингтонтой харилцаагаа сайжруулахыг хүсч байгаагаа Хятадын төрийн мэдээллийн сувагт ярьжээ. ОХУ-ын Ерөнхийлөгч Владимир Путин, Украины удирдагч Владимир Зеленский нарт “Энх тайван байдал нь бүх дэлхийн ашиг сонирхолд нийцнэ” гэж “ятгах” нь ухаалаг гарц гэж Бразилын ерөнхийлөгч үзэж буйгаа хэлэв.
Украины дайныг улс төрийн арга замаар зогсооход илүү олон улс орон оролцож, илүү үүрэгтэй тоглох шаардлагатай, энэ чиглэлээр байр суурь, харилцаа холбоогоо илүүтэй хадгална, дайныг энхийн замаар зогсоох бүх талын хүчин чармайлтыг дэмжинэ гэдгээ Ши, Лула нар харилцан тохирлоо.
Хятад улс Бразилыг бүс нутагтаа интеграцичлах үйл явцыг урагшлуулах, олон улсын талбарт илүү үүрэгтэй оролцоход нь дэмжлэг үзүүлэхээ уулзалтын үеэр илэрхийлсэн байна.
