Ч0Монгол Улсаас Кувейт Улсад суугаа Онц бөгөөд Бүрэн эрхт Элчин сайд П.Сэргэлэн 2025 оны 9 дүгээр сарын 10-ны өдөр Кувейт Улсын Хөдөө аж ахуй, загасны нөөцийн Ерөнхий газрын Амьтны эрүүл мэнд хариуцсан газрын захирал Мухаммад Камал-тай уулзаж, Монгол Улсын Мал эмнэлгийн Ерөнхий газраас баталгаажуулсан Монгол Улсаас Кувейт Улс руу амьд хонь, ямаа экспортлох эрүүл мэндийн гэрчилгээг гардуулан өгч, тус газрын захирал Мухаммад Камал гарын үсэг зурснаар гэрчилгээг эцэслэн тохиров.
Уулзалтын эхэнд Элчин сайд П.Сэргэлэн Монгол Улсын хүнс, хөдөө аж ахуй, хөнгөн үйлдвэрийн салбар, тэр дундаа мал аж ахуйн салбарын талаар дэлгэрэнгүй танилцуулахын зэрэгцээ Кувейт Улсын Хөдөө аж ахуй, загасны нөөцийн Ерөнхий газрын Амьтны эрүүл мэнд хариуцсан газрын захирал Мухаммад Камал-д богино хугацаанд талууд эрүүл мэндийн гэрчилгээг эцэслэн тохироход дэмжлэг үзүүлж, шуурхай ажиллаж байсан явдалд талархал илэрхийлж, Монгол Улсаас Кувейт Улс руу амьд хонь, ямаа экспортолж эхэлснээр Кувейт Улсын махны хэрэгцээ, хүнсний аюулгүй байдалд тодорхой хувь нэмэр оруулж, мөн хоёр улсын худалдаа, эдийн засгийн хамтын ажиллагааг шинэ шатанд аваачна гэдэгт итгэлтэй байгаагаа илэрхийлэв.
Кувейт Улсын Хөдөө аж ахуй, загасны нөөцийн Ерөнхий газрын Амьтны эрүүл мэнд хариуцсан газрын захирал Мухаммад Камал Монгол Улсаас Кувейт Улс руу амьд хонь, ямааны экспортыг эхлүүлэх эрх зүйн орчин бүрдсэнд сэтгэл хангалуун байгаагаа илэрхийлээд эцэслэн байгуулсан эрүүл мэндийн гэрчилгээг холбогдох байгууллагуудад хүргүүлж, зөвшөөрлийг ойрын хугацаанд олгохоо нотлов.
Тус Элчин сайдын яамны 2025 оны ажлын төлөвлөгөөнд орсон Монгол Улсаас Кувейт Улс руу хийж буй шинэ сэврээсэн махны экспортыг нэмэгдүүлэх, мөн амьд хонь, ямааны экспортыг эхлүүлэх ажил хэрэгжиж байна.
Кувейт Улс нь дотоодын махны хэрэгцээний 95 орчим хувийг импортоор хангадаг бөгөөд нэг хүнд ноогдох махны хэрэглээгээр дэлхийд 33, Арабын орнуудад 5, Булангийн орнуудад 2-т жагсаж байна.
