“Намрын ногоон өдрүүд – Үндэсний үйлдвэрлэл 2026” нэгдсэн арга хэмжээнд нийслэл болон 21 аймгийн 530 гаруй иргэн, аж ахуйн нэгж оролцож, зургаан хоногийн хугацаанд нийт 2.2 тэрбум төгрөгийн борлуулалт хийсэн байна. Энэ нь өнгөрсөн оны мөн үеийнхээс 22 хувиар өссөн үзүүлэлт юм.
Өргөтгөсөн худалдаа өнөөдөр үргэлжилж байгаа бөгөөд Монгол Улсын Ерөнхий сайдын санаачилгаар төмс, хүнсний ногооны борлуулалтыг долоо хоногоор сунгахаар шийдвэрлэжээ. Ингэснээр есдүгээр сарын 28-наас аравдугаар сарын 3-ныг хүртэл Төв цэнгэлдэх хүрээлэнд төмс, хүнсний ногооны худалдаа үргэлжилнэ.
Энэхүү шийдвэр нь улирлын нийлүүлэлтийг оновчтой зохион байгуулж, иргэдийг шинэ ургацын хүнсний ногоогоор тасралтгүй, тогтвортой хангахад чухал ач холбогдолтой юм.
