Монголын Мянганы сорилтын сан (“Монголын МСС”) болон “Эйч Ти Эл” ХХК хооронд 2023 оны 01 сарын 02-нд байгуулсан “Гэр хорооллын ус түгээх байр автоматжуулах тоног төхөөрөмжийг нийлүүлж, суурилуулах” гэрээний хүрээнд Улаанбаатар хотын 6 дүүргийн 51 хорооны нутаг дэвсгэрт байрлах гэр хорооллын шугамд холбогдсон 180 ус түгээх байрыг автоматжуулах төслийг хэрэгжүүлж байгаа.
Гэр хорооллын ус түгээх байрыг автоматжуулах тоног төхөөрөмж нийлүүлэх, суурилуулах төслийн хүрээнд шугамын 180 ус түгээх байруудад суурилуулах IP 67 буюу ус, чийг, шороо тоосны хамгаалалттай цахилгааны самбар, IP55 буюу ус чийгний хамгаалалттай NVR самбарыг тус тус чанарын шаардлагын дагуу БНХАУ-ын Вэнжоу хотын “SAIPWELL” цахилгааны самбар угсралтын компанид үйлдвэрлэж, дотор тоног төхөөрөмжүүдийг угсарч байгаа юм.
Тэгвэл самбаруудыг үйлдвэрлэх болон тоног төхөөрөмж угсрах ажлын явцтай танилцан, ажиллагааг шалгаж, турших ажлыг 2023 оны 8 сарын 25-27-ны өдрүүдэд амжилттай гүйцэтгэжээ.
Усны салбарын тогтвортой байдлыг хангах төслийн хүрээнд хэрэгжүүлж буй энэхүү дэд төслөөр гэр хорооллын шугамд холбогдсон 180 ус түгээх байр буюу худгийг 24 цагийн ажиллагаатай болгож бүрэн автоматжуулна. Ингэснээр гэр хорооллын оршин суугчдад усны үйлчилгээг ойртуулж, ус хангамжийн үйлчилгээний хүртээмжийг нэмэгдүүлэх юм.
