ОХУ-ын эрх баригчид Украйны эсрэг дайныг шүүмжилсэн залуу үеэ хорьж цагдаж байгаа талаар CNN мэдээлжээ. Тухайлбал, 19 настай Олеся Кривцова 10-р сард Крымын гүүрэн дээр болсон дэлбэрэлтийн дараа ОХУ-ын Украйны эсрэг түрэмгийллийг ISIS, Аль-Каида, Талибаны террор ажиллагаатай адилтган инстаграммдаа пост оруулсан учир Оросын армийн нэр хүндийг олон нийтийн сүлжээгээр гутаан доромжилсон, терроризмыг зөвтгөдөг хэмээн буруутгагджээ.
Бүсгүйн хөдөлгөөн бүрийг хянадаг бугуйвч хөлд нь зүүж гэрийн хорионд оруулсан байна.
Тэрээр Архангельск хотын баруун хойд хэсэгт орших Хойд (Арктик) Холбооны Их Сургуулийн оюутан бөгөөд Оросын нийгмийн сүлжээнд оюутны чатаар дайны талаар шүүмжилсэн нийтлэл бичсэн учир Оросын армийн нэр хүндийг гутаасан хэргээр эрүүгийн хэрэгт шалгагдаж байгаа ажээ.
Олеся одоо Архангельск мужийн Северодвинск дахь ээжийнхээ байранд гэрийн хорионд байгаа бөгөөд интернетэд орох, харилцааны бусад хэлбэрийг ашиглахыг хориглосон байна. Кривцовагийн өмгөөлөгч Алексей Кичин “Олесягийн хэрэг анхных ч биш, сүүлчийнх ч биш” гээд өсвөр насны охин Оросын армийн нэр хүндийг гутаасан хэргээр гурван жил, терроризмыг зөвтгөсөн гэсэн зүйл ангиар долоо жил хүртэл хорих ял авч магадгүй байна гэжээ.
Олеся эсэргүүцлээ илэрхийлж бугуйвч зүүгээгүй шагайн дээрээ “Том ах чамайг харж байна” гэсэн бичээс бүхий ОХУ-ын Ерөнхийлөгч Владимир Путины нүүрийг аалзны биед наасан шивээс хийлгэжээ.
Хүний эрхийн хараат бус ажиглагч “OVD-Info” байгууллагаас мэдээлснээр 2022 онд Орост интернетээр терроризмыг зөвтгөсөн гэх үндэслэлээр дор хаяж 61 хэрэг үүсгэн, одоогийн байдлаар 26 хэрэгт ял оноожээ.
Олесягийн ээж Наталья Кривцова, ОХУ-ын засгийн газар миний охины хэргээр далимдуулж олон нийтэд анхааруулга өгөхийг хичээж байна гэжээ.
Энэ хэрэг нь Олеся Кривцовагийн үзэл бодлоо олон нийтэд илэрхийлснээс болж эрх баригчидтай тэрсэлдсэн анхны тохиолдол биш юм. Өнгөрсөн тавдугаар сард тэрээр дайны эсрэг зурагт хуудас тарааж Оросын армийн нэр хүндийг гутаасан хэргээр захиргааны хариуцлага хүлээж байсан бөгөөд ижил зүйл ангиар давтан гэмт хэрэг үйлдсэн нь эрүүгийн хэрэг үүсгэхээс аргагүй байдалд хүргэсэн аж.
“Тэр шударга ёсны мэдрэмж өндөр байгаа нь түүний амьдралыг хэцүү болгодог. Амаа хамхиж чадахгүй байгаа нь одоо ОХУ-д томоохон нүгэл болж байна” гэж ээж нь CNN-д ярьжээ.
