Томуугийн дэгдэлттэй холбогдуулан өрхийн эрүүл мэндийн төвүүдийг уртасгасан цагаар ажиллуулахаар шийдвэрлэлээ. Ингэхдээ бүх Өрхийн эрүүл мэндийн төвүүдийг биш тухайн дүүргийг бүсчлээд, бүсчлэл тус бүрт өрхийн эрүүл мэндийн төв болон хүүхдийн кабинетыг уртасгасан цагаар ажиллуулна. Эдгээр хүүхдийн кабинет болон Өрхийн эрүүл мэндийн төвүүд ажлын өдөр оройн 20:00 цаг хүртэл, амралтын өдрүүдэд 11:00-18:00 цаг хүртэл, бүх нийтийн амралтын өдөр 11:00-17:00 цаг хүртэл ажиллана.
Засгийн газраас хүүхдээ харж байгаа аав, ээжүүд төрийн алба хаагч бол тав хоног хүртэл цалинтай чөлөө олгохоор шийдвэрлэсэн. Тиймээс хүүхэд нь халуурсан, ханиад томуутай байгаа бол харьяа Өрхийн эрүүл мэндийн төвдөө үзүүлсэн эмчийн хуудсыг үндэслэн тухайн байгууллагаасаа тав хоногийн цалинтай чөлөө авах боломжтой.
Томуу, томуу төст өвчнөөс урьдчилан сэргийлэх хамгийн гол алхам бол гэрийн асаргаа байдаг. Тиймээс гэртээ хүүхдээ асрах нь чухал байна. Хүүхдээ олон нийтийн газраар аль болох дагуулж явахгүй байх, нийтийн тээврээр зорчихдоо амны хаалтаа тогтмол хэрэглэхийг зөвлөж байна
