IMMAF буюу Олон улсын холимог тулааны холбооноос 2025 оны насанд хүрэгчид, залуучуудын ДАШТ-аа Гүржийн нийслэл Тбилиси хотноо зохион байгуулж байна. Тэмцээний тав дахь өдөр буюу өчигдөр/2025.10.01/ Монгол Улсаа төлөөлөн оролцсон Б.Алтанчимэг залуучуудын ангилалд дэлхийн аварга боллоо. Өнгөрсөн жил хүрэл медаль хүртэж байсан тэрбээр энэ удаад эмэгтэйчүүдийн -65.8 кг-ын жингийн шигшээд Анголын Надир Вьератай учраа таарч, өрсөлдөгчөө хоёрдугаар үед хөлийн гурвалжин боолтоор буулган авчээ. Монгол Улсын хоёр удаагийн аварга, Ази тивийн хүрэл медальт Б.Алтанчимэг ийнхүү холимог тулааны спортоор залуучуудын дэлхийн аварга болсон Монголын анхны тамирчин болж байна.
Дэлхийн 80 гаруй орны 1000 гаруй шилдэг холимог тулаанчид өрсөлдөж байгаа Тбилисийн ДАШТ өнөөдөр насанд хүрэгчдийн шигшээ тулаануудаар өндөрлөх болно. Тус тэмцээнд Монгол улсаас нийт 4 тамирчин 1 дасгалжуулагчийн бүрэлдэхүүнтэй баг оролцсон. Монголын холимог тулааны холбооны мэдэгдэлд “Дэлхийн аваргын дэвжээнд эх орныхоо алтан соёмбот төрийн далбааг мандуулж, төрийн дууллаа эгшиглүүлсэн One Team Fighting Center-ын тамирчин Байгалмаагийн Алтанчимэгтээ баяр хүргэж, дараа дараагийн тэмцээнд уралдаанд нь өндөр амжилтыг хүсэн ерөөе” гэжээ.
