Төв аймгийн Мөнгөнморьт сумын Жаргалант багийн “Илүүрийн гол” гэдэг газарт самар түүхээр явсан 3 иргэн буцах замдаа автомашин нь шаварт суусан үед, иргэн Д /35 настай, эрэгтэй/ сураггүй алга болжээ. Энэ тухай дуудлагыг 09.24-ний өдрийн 18:45 цагт Онцгой байдлын алба хүлээн авсан. Тус аймгийн Онцгой байдлын газрын Эрэн хайх, аврах салбар, Мөнгөнморьт сум дахь Гал түймэр унтраах, аврах 75 дугаар ангийн алба хаагчид, сумын Цагдаагийн хэсгийн алба хаагчид, ар гэрийнхэн иргэн Д /35 настай, эрэгтэй/-г эрэн хайх ажиллагааг зохион байгуулан хоёр дахь өдрөө ажиллаж байна.
Мөн Хөвсгөл аймгийн Тариалан сумын Давааны ар багийн “Дуургын нуруу” гэдэг газарт /аймгийн төвөөс зүүн хойд зүгт 230 км, Тосонцэнгэл сумаас зүүн хойд зүгт 130 км, Тариалан сумаас хойд зүгт 70 км/ Тосонцэнгэл сумын харьяат 4 хүн самар түүж байснаас 09.21-ний өдрийн 15:00-16:00 цагийн орчим иргэн Э нь отгоосоо 1 км зайтай газарт түүсэн самраа сахиж үлдсэн бөгөөд хамт явсан хүмүүс нь самар түүгээд буцаж ирэхэд нь сураггүй болсон хэрэг гарсан тухай бид өмнө нь мэдээлсэн.
Тухайн эмэгтэй алга болоод дөрөв хонож байгаа бөгөөд Хөвсгөл аймгийн Онцгой байдлын газар, Үндэсний аврах бригадын алба хаагчид, Тариалан сумын Цагдаагийн тасгийн алба хаагчид, Тосонцэнгэл сумын мэргэжлийн ангийнхан, нутгийн иргэд эрэн хайх ажиллагааг зохион байгуулж байна.
Иргэд самранд их явж байгаа энэ үед анхаарал болгоомжтой зорчихыг анхааруулж байна
