“Бизнесийн сэргэлт” хөтөлбөрийн хүрээнд 10.000 залууг бизнесийн сургалтад хамруулах бүртгэл эхэлснийг Монголын үндэсний худалдаа аж үйлдвэрийн танхим (МҮХАҮТ)-аас мэдээллээ. Энэхүү хөтөлбөр нь гурван үе шаттай хэрэгжинэ. Эхний ээлжид олон улсын бизнесийн магистрын мэдлэгийг богино хугацаанд олгох P-MBA (Personal MBA) сургалтад 10.000 залууг сургах юм. 2024 оны 4-6 дугаар сард хуваарийн дагуу Улаанбаатар хотод зургаан элсэлтээр 4000, аймаг орон нутагт 1-2 удаагийн элсэлтээр 6,000 залууг сонгон суралцуулна.
Хүйсийн хувьд эрэгтэй, эмэгтэй ижил тэнцүү байх, хөгжлийн бэрхшээлтэй иргэдийг хамруулах зэрэг бодлого барьж байгаагаа МҮХАҮТ-ын гүйцэтгэх захирал Т.Дүүрэн хэлсэн. Мөн оролцоог тэгш хангахын тулд нэг аймгаас 300 иргэн байхаар тооцож бүртгэх юм байна. Сургалтад сүүлийн 12 жилийн хугацаанд олон улсад шилдэг борлуулалттайгаар шалгарсан ном, сурах бичиг дагалдана. Тус сургалтын төгсгөлд бизнесийн шинэ санаа, төслөө боловсруулсан байх бөгөөд түүнээс нь шалгаруулалт хийнэ.
Бүртгэлийн холбоос: http://forms.mongolchamber.mn/view.php?id=210131
Эх сурвалж: Монголын Үндэсний Худалдаа Аж Үйлдвэрийн Танхим
