Хэнтий аймгийн Норовлин сумын ерөнхий боловсролын сургуулийн багш, сурагчид өвлийн спортын анхдагч “Цанатай-Норовлин” клубийн тамирчин сурагчдаа хүндэтгэлтэйгээр угтаж авлаа. Бяцхан тамирчид Хэнтий, Дорнод аймгийн “Өсвөрийн цаначдын аймгийн аварга” шалгаруулах тэмцээнд Норовлин сумынхаа сургуулийн тугийг мандуулжээ. Сургуулийнхаа тугийг аймгийн аваргын гурван мөнгөн медаль, нэг хүрэл, тусгай байрын дөрвөн цомын амжилтаар мялаасан сайхан мэдээтэй. Шилжин явах багийн “Алтан цом”-оо сургуулийн тугтайгаа сургуулийн хамт олондоо хүндэтгэлтэйгээр гардуулан өгсөн байна.
“Цанатай-Норовлин” клуб цаашид Норовлин сумын ерөнхий боловсролын сургуулийн дэргэд үйл ажиллагаагаа явуулж, сургуулийнхаа нэрээр бүс, аймаг, улсын тэмцээнд оролцохоор болжээ. Тэртээх 33 жилийн өмнө цана, тэшүүрт дурлуулсан буурал багш В.Сэнгэдорж агснаа эргэн дурссан байна. Норовлин сумын тамирчид өвлийн спортын хаан гэгдэх хоёр төрлийн иж бүрдэл 38 ширхэг цанатай болжээ. Хүүхэд залуусыг өвлийн спортод дурлуулж, чөлөөт цагийг нь нийтийн биеийн тамирыг дэмжин өнгөрүүлэх энэхүү санаачилга бусад аймаг, сумдад сайн жишиг болон түгж эхэллээ. 
