НИТХ-ын ээлжит XVIII хуралдаан боллоо. Монгол Улсын сайд, Нийслэл Улаанбаатар хотын автозамын түгжрэлийг бууруулах Үндэсний хорооны дарга Ж.Сүхбаатар хуралд оролцож, Улаанбаатар хотын түгжрэлийг бууруулах зорилтын хүрээнд хийж байгаа ажлуудаа товч танилцууллаа. Тэрбээр “Монгол Улсын Засгийн газраас түгжрэлийн асуудалд бодлогын дэмжлэг үзүүлэхээр онцгойлон анхаарч байгаа. 2022 оноос нийт 837 тэрбум төгрөгийн төсөвт өртөг бүхий төсөл арга хэмжээг хэрэгжүүлж эхэлсэн байна. Төлөвлөсөн арга хэмжээний 97 хувь буюу 808.9 тэрбумын ажил гүйцэтгэх гэрээг байгуулсан” гэв.
Улаанбаатар хотын авто замын сүлжээний тухайд сүүлийн 10 жилийн хугацаанд 19 хувиар нэмэгдсэн байна. Тодруулбал, 954 км урттай зам 2023 оны байдлаар 1213 км болсон бол тээврийн хэрэгслийн тоо 234.2 мянгаас 661 мянга болж 2.5 дахин нэмэгдсэн гэдгийг тэрбээр мэдээлэлдээ онцоллоо.
Мөн “Авто машин, хүний суурьшил, барилгажилт цаашдаа ч өсөн нэмэгдэнэ. Энэ бүхний урхаг нь түгжрэл. Дэлхийн хотуудын түгжрэл хөгжил дэвшил, хүн амын өсөлтөөс шалтгаалж байгаа бол Улаанбаатарын түгжрэлийн суурь шалтгаан нь авилга” гэлээ.
