Ж.Бямбасүрэн Монгол Улсаас Эверестийн оргилд гарсан 7 дахь уулчин боллоо

Уулын спортын мастер, "Хайрхан" аялагч клубыг үүсгэн байгуулагчдын нэг Ж.Бямбасүрэн 2018.05.16-ны 13:47 цагт /Улаанбаатарын цагаар/ дэлхийн дээвэр гэгддэг Эверестийн оргилд бараалхжээ. Тэрбээр Монголын уулчдаас Эверестийн оргилд гарсан 7 дахь уулчин болж байна.

Ж.Бямбасүрэн нь дэлхийн уулчдын 7 summit буюу 7 тивийн 7 ноён оргилд мөрөө гаргадаг сонгодог хөтөлбөрийг сонгон Европ, Африк, өмнөд болон хойд Америк, Австрали тив, дэлхийн арлуудын тэргүүн оргилуудад 2012 оноос хойш авирсан юм.

Дэлхийн дээвэр гэгддэг 8848 м Эверестийн оргилд 2017 оныг дуустал нийт 8,306 хүн  бараалхсан байдгаас Монгол Улсаас МУГТ Б.Гангаамаа, МУГТ Б.Цэвээндаш, МУГТ Г.Өсөхбаяр, ОУХМ Ц.Цогзолмаа, ОУХМ С.Бат-Эрдэнэ , ОУХМ Л.Баярсайхан нар уулчин хүний хүсэл мөрөөдөл болсон дэлхийн зулайд улсынхаа далбааг мандуулсан түүхтэй.