ОХУ дотоодын зах зээлээ тогтворжуулах үүднээс бензин, дизель түлшний экспортоо түр хугацаагаар хориглохоо өчигдөр мэдэгдэв. Энэ хориг хуучин ЗХУ-ын бүрэлдэхүүнд Беларусь, Казахстан, Армен, Киргизэд үйлчлэхгүй. Монгол Улсад хамаатай эсэхийг албаны шугамаар тодруулж байгаа талаар Уул уурхай, хүнд үйлдвэрийн сайд Ж.Ганбаатар хэвлэлийнхэнд мэдээлэл өгсөн. УИХ-ын дарга Г.Занданшатар маргаашаас манай улсад айлчлах гэж байгаа ОХУ-ын Төрийн Думын дарга В.В.Володинтой өнөөдөр утсаар ярьж, шатахууны энэхүү хязгаарлалтад Монгол Улсыг оруулахгүй байхыг хүссэн байна. Энэхүү хүсэлтийг ОХУ-ын тал хүлээн авч Монгол Улсад шатахуун хэвийн нийлүүлэхээр болжээ. УИХ-ын дарга Г.Занданшатар Баянхонгорт аймагт болсон уулзалтын үеэр энэ мэдээг дуулгажээ. Товчхондоо бол ОХУ шатахуунаа Монголд хэвийн нийлүүлэхээр боллоо.
УИХ-ын дарга Г.Занданшатар өнгөрсөн 6-р сард В.В.Володины урилгаар ОХУ-д айлчилсан. Г.Занданшатарыг ОХУ-г зориход Украинд халдсан улс руу айлчиллаа гэж цөөнгүй хүн шүүмжилж байв. Гэхдээ тухайн үед ОХУ-аас Ангарскийн нефтийн үйлдвэрт засвар, шинэчлэл хийх шаардлагатай тул 2 сарын хугацаанд Монголд шатахуун нийлүүлэх боломжгүй гэсэн мэдэгдэл ирчихсэн байсныг юм билээ. УИХ-ын даргын айлчлалын үеэр холбогдох албаны хүмүүстэй хэлэлцээ хийж, засвар шинэчлэлийн үеэр Монголд хэрэгцээт шатахууныг урьдчилан нөөцлөх замаар зохицуулахаар болж, нийлүүлэлтийг хэвийн үргэлжлүүлсэн байдаг. Ийм зохицуулалтыг шуурхай хийгээгүй бол 6-р сарын сүүлчээс шатахууны хомсдол үүсэж, үнийн хөөрөгдөл тэнгэрт тулах байсан биз.
ОХУ-ын Төрийн Думын дарга Вячеслав Викторович Володин Монгол Улсад айлчлахаар маргааш Улаанбаатарт ирнэ. Айлчлалаар мэдээж хэрэг хоёр улсын парламент хоорондын хамтын ажиллагааг түлхүү ярьж таарна. Нэмээд ОХУ-ын шатахууны экспортын хоригт Монгол Улсыг оруулахгүй гэсэн ноён В.В.Володины утсаар өгсөн амлалтыг талууд албажуулж, цаасан дээр шийдвэр болгон буулгахаар болж байна. Ямартай ч оросууд шатахууныхаа крантыг хаахгүй байхаар болов. УИХ-ын дарга Г.Занданшатарын угсраа нүүдэл монголчуудыг шатахууны хомсдолд орох эрсдэлээс ийн холдуулав.
