Гэр хорооллын шугамд холбогдсон ус түгээх байруудыг автоматжуулах төсөл хэрэгжүүлнэ. Тодруулбал, Монгол Улсын Засгийн газар болон АНУ-ын Мянганы сорилтын корпорац (МСК)-ын хооронд байгуулсан II Компакт гэрээний дагуу хэрэгжиж буй Усны салбарын тогтвортой байдлыг хангах төслийн хүрээнд гэр хорооллын ус хангамжийн үйлчилгээний хүртээмжийг нэмэгдүүлж, зардлыг бууруулах зорилго бүхий УСУГ-ын шугамд холбогдсон ус түгээх байруудыг автоматжуулах ажлыг хэрэгжүүлэхээр болжээ.
Уг ажлын хүрээнд Улаанбаатар хотын 6 дүүрэгт байрлах шугамд холбогдсон, гар ажиллагаатай, айл өрхийн хэрэглэгчдэд үйлчилдэг болон ачилтын нийт 180 ус түгээх байрыг автоматжуулахын зэрэгцээ УСУГ-ын одоогийн ашиглаж буй 151 автомат буюу ухаалаг ус түгээх байрыг шинэ системд нэгтгэн удирдах программ хангамжийг хөгжүүлж, узель, гадна, дотор цахилгаан хангамжийг шинэчилж, иж бүрэн автоматжуулах тоног төхөөрөмжийг дагалдах сервер, компьютер, хэрэгслийн хамт нийлүүлж, суурилуулах юм.
Ингээснээр Улаанбаатар хотын гэр хорооллын 6 дүүргийн нийт 51 хорооны иргэд УСУГ-аас түгээж буй унд ахуйн стандартын шаардлага хангасан усыг 24/7 цагаар авах боломжтой болох ба гэр хорооллын ус хангамжийн хүртээмжийг нэмэгдүүлж уг үйлчилгээг үзүүлэхэд тус байгууллагаас зарцуулж буй өндөр зардлыг бууруулах юм.
