“Japan Airlines” авиа компани Нарита-Улаанбаатар чиглэлд чартер нислэг үйлдэх болсноо зарлалаа. Наймдугаар сарын сүүлчээр хоёр удаагийн нислэг үйлдэнэ. Ингэхдээ Наритагаас наймдугаар сарын 24, 28-нд, Улаанбаатараас наймдугаар сарын 28, есдүгээр сарын 1-нд тус тус нисэх ажээ. Наритагаас өглөө хөөрч, Улаанбаатарт үдэд ирэх бол, Улаанбаатараас үдэд хөдөлж, Наритад орой буух хуваарьтай. Онгоцны хувьд “Boeing 767-300ER” онгоц байна.
Хоёр удаагийн нислэг аль аль нь таван өдөр, дөрвөн шөнийн аяллын зориулалттай байх юм. Аяллыг “HIS”, “Club Tourism”, “JTB”, “Nippon Travel”, “Hankyu Travel” компаниуд хариуцна. Мөн нислэг тутамд 200 зорчигч багтах ажээ.
