Урин дулаан цаг ирэхтэй зэрэгцэн нийслэлд барилгын ажил ид өрнөдөг. Тэгвэл барилгын ажилтай холбоотой зарим асуудлаар УСУГ-ын Хэрэглэгчдэд үйлчлэх албанаас дараах мэдээллийг өглөө.
Төвийн цэвэр, бохир усны шугамд холбогдох хүсэлтэй аж ахуйн нэгж байгууллагууд УСУГ-тай гэрээ хийж , холболтоо хийлгэдэг. Тэгвэл цэвэр, бохир усны шугамд холбогдох зөвшөөрлийг УСУГ нь жил бүрийн тавдугаар сарын 01-нээс арваннэгдүгээр сарын 01-ний хооронд олгодог байна. Жилд ойролцоогоор 400 гаруй хэрэглэгч цэвэр бохир усны шугамд холбогддог ажээ. Цэвэр, бохир усны шугамд холбогдохыг хүссэн хэрэглэгч холбогдох бичиг баримтыг бүрдүүлж УСУГ-ын Хяналт удирдлагын төвийн нэг цэгийн үйлчилгээнд хандаж холболтын гэрээгээ байгуулж зөвшөөрлөө авдаг бөгөөд үүний дараа УСУГ-аас холболтыг хийж өгдөг байна.
Мөн барилгын ажил эхлүүлж газар шорооны ажил хийхийн өмнө тухайн газар дор нь ус хангамж ариутгах татуургын шугам сүлжээ байгаа эсэхийг мэргэжлийн байгууллагаас тодруулах зайлшгүй шаардлагатайг УСУГ-аас анхаарууллаа. Ингэж тодруулалгүй газар шорооны ажил хийснээс ус хангамж ариутгах татуургын шугам сүлжээ болон бусад инженерийн шуам сүлжээг гэмтээх, хэрэглэгчийн ус хангамжийг таслах зэрэг эрсдэл гардаг байна.
