Өнгөрсөн долоо хоногт хоёр ч удаа Сербид буутай холбоотой гэмт хэрэг гарч 17 хүн амиа алдсан.Үүнтэй холбоотойгоор нийслэл Белград болон бусад хотод зэвсэгт хүчирхийллийн эсрэг жагсаалд хэдэн арван мянган сербүүд нэгдээд байна. Лхагва гарагт бага сургуульд, пүрэв гаригт хөдөө тосгонд болсон зэвсэгт халдлагын үеэр 21 хүн гэмтэж 17 хүн амиа алдсаны 8 нь бага сургуулийн хүүхэд байв. Бага сургуульд болсон зэвсэгт халдлагыг 13 настай хүү хийсэн нь тус улсын иргэдийг цочролд оруулсан билээ.
Жагсагчид төрийн өндөр албан тушаалтнуудыг огцрохыг шаардаж, хүчирхийллийг сурталчилж буй сонин, телевизүүдийг хаахыг хүсчээ. “Серби хүчирхийллийн эсрэг” гэсэн бичигтэй тугийг өргөн хотын төв дундуур жагссан байна.
Мөн нийслэл рүү урсдаг Дунай мөрөн рүү цэцэг шидсэн эсэргүүцлийн жагсаал хойд нутгийн Нови Сад хотод болжээ. Олон мянгуулаа цугласан жагсагчид Сербийн Дотоод хэргийн сайд болон тагнуулын газрын даргыг огцрохыг шаардсан байна.
Сербийн Боловсролын сайд Бранко Рузич дунд сургуульд болсон аллагад харамсч буйгаа мэдэгдээд ням гарагт албан тушаалаасаа огцорсон. Харин Сербийн Ерөнхийлөгч Александр Вучич эсэргүүцлийн жагсаалыг буруушааж, сөрөг хүчнийг үндэсний эмгэнэлт явдлыг ашиглан өөрсдийн ашиг сонирхлыг дэмжсэн гэж буруутгаж байна. Тэрбээр ээлжит бус санал хураалтаар намынхаа нэр хүндийг шалгахад бэлэн гэдгээ мэдэгдэв. “Би ажлаа үргэлжлүүлнэ, гудамж, танхайрсан хүмүүсийн өмнө хэзээ ч ухрахгүй. Засгийн газрын бүтцийн өөрчлөлт ч юм уу, сонгууль ч юм уу явуулж болно” гэж тэрээр телевизээр ярьжээ. Засгийн газар галт зэвсгийн эсрэг арга хэмжээг чангатгана гэж амалсан ч сөрөг хүчнийхэн хожимдсон арга хэмжээ гэж шүүмжилж байна.
Өчигдөр буюу даваа гарагт хичээл эхлэх үед Белградын бүх сургуулийн ойролцоо цагдаа нар хамгаалалтад гарсан ба Засгийн газар сургуулиудад байршуулах офицеруудыг нэмэхээр төлөвлөжээ.
Сербид сүүлийн жилүүдэд болсон засгийн газрын эсрэг хамгийн том жагсаал нь энэ гэж мэдээллийн агентлагууд дүгнээд байна.
