Одоогоос яг жилийн өмнө Засгийн газраас улс орон даяар урьдчилан сэргийлэх, эрт илрүүлэг үзлэг, шинжилгээ, оношилгоонд иргэдээ хамруулах ажлыг эхлүүлсэн. Тэгвэл НЭМҮТ-өөс мэдээлснээр тавдугаар сарын нэгний байдлаар эрт илрүүлэг үзлэг оношилгоонд нэг сая иргэн хамрагджээ.
Эрт илрүүлэгт хамрагдсан иргэдийн 55 хувь нь эмэгтэй, 45 хувь эрэгтэйчүүд байгаа бөгөөд 60.5 хувь нь 0-17 насны хүүхэд байна. Мөн үзлэгт хамрагдсан иргэдийн 49.7 хувь нь орон нутгаас, 50.3 хувь Улаанбаатараас хамрагджээ.
18-30 насныхан эрт илрүүлэгт хамгийн бага буюу нийт хамрагдах ёстой иргэдийн 10.6 хувь нь л хамрагдсан гэсэн тооцоо гарсан байна. Энэ насныхан нэрүүл мэндийн даатгалаа төлөөгүй, оршин суух хаягтаа байнга байдаггүй, эрт илрүүлгийн ач холбогдлыг төдийлөн сайн ойшоохгүй, мэдэхгүй байгаа зэргээс хамрагдах нь цөөн байна гэж НЭМҮТ-ийн мэргэжилтэн хэллээ.
Эрт илрүүлэгт хамгийн сайн хамрагдсан 0-17 насныхны дунд амны хөндийн өвчлөл маш түгээмэл байжээ. Нийт илрүүлгийн хүрээнд хорт хавдарын 3215 сэжигтэй тохиолдлыг илрүүлсэн ба ходоод, элэг, хөхний хавдар зонхилон илэрчээ.
Хоол боловсруулах, дотоод шүүрэл, шээс бэлгийн зам, амьсгалын замын өвчин зонхилон илэрсэн байна.
Эрт илрүүлэг хөтөлбөр энэ он дуустал үргэлжлэх бөгөөд цаашид зургаан багц насны хүрээнд жилд нэг удаа эрт илрүүлэгт хамруулах ажээ. Эрт илрүүлэгт орохоор ирэхдээ эмчээсээ хэрхэн биеэ бэлдэх талаар зөвлөгөө авч ирэхийг мэргэжлийн хүмүүс санууллаа. Учир нь шинжилгээнд орох ёстой иргэн өглөө хоол идсэн, бохь зажилсан, өтгөнөөс шинжилгээ авах боломж бүрдүүлж биеэ бэлдээгүйгээс буцах тохиолдол гарч байгаа ажээ.
