Саран дээр туршилтын аппарат буулгасан анхны арилжааны компани болох зорилготой Японы “Ispace” гэх компани удахгүй саран дээр “Хакуто-Р” нэртэй буугч аппаратаа газардуулна гэж мэдэгдээд буй. Тодруулбал, саран дээр буух төхөөрөмж одоогоор сарыг тойрон тойрог замд явж байгаа бөгөөд энэ сарын 26-ны 12:40 цагт саран дээр газардахаар төлөвлөж байгаа аж.
Уг буугч аппаратыг өнгөрсөн оны 12 дугаар сард “SpaceX” компанийн “Falcon 9” пуужингаар АНУ-ын Флорида муж улсын Канаверал хошууны сансрын буудлаас хөөргөсөн бөгөөд одоогоор сарны зууван тойрог замд байгаа аппарат сарны гайхалтай зургуудыг илгэээгээд байгаа аж.
Саран дээр газардах ажиллагаа амжилттай болвол “Хакуто-Р” саран дээр аюулгүй газардсан анхны хувийн сансрын хөлөг, Япон саран дээр газардсан дөрөв дэх орон буюу болох АНУ, ЗХУ, БНХАУ-ын дараа нэр нь бичигдэх юм.
Өнгөрсөн онд Японы Сансар судлалын агентлаг /JAXA/ “Omotenashi” сансрын аппаратын саран дээр буух төлөвлөгөө бүтэлгүйтсэн билээ.