Улаанбаатар хотод 2000 оноос өмнө барьсан, дулаан алдагдал өндөртэй угсармал орон сууцны 1077 блок барилга байдаг.
Тэгвэл эдгээр барилгын дулаан алдагдлыг бууруулах, их засвар хийж, эрчим хүч хэмнэх, дулаан, техникийн шинэчлэл хийх нэгэн төсөл хэрэгжих нь ээ. “Улаанбаатар хотын орон сууцны эрчим хүчний үр ашгийг дээшлүүлэх ” НАМА” дэмжлэгт төслийг хэрэгжүүлэх гэрээнд БХБЯ, УБЗАА, Германы олон улсын хамтын ажиллагааны нийгэмлэг (GIZ) нар гарын үсэг зурлаа.
Төсөл 2026 он хүртэл хэрэгжих ба энэ хугацаанд нийт 375 барилгыг дулаалж, засварлахаар гэрээнд төлөвлөжээ. Төслийн хоёр дахь үе шат 2023 оны сүүлчээр эхэлж, 50-60 угсармал барилгыг сэргээн засварлана.
Уг барилгуудын дулаан алдагдлыг бууруулснаар эрчим хүчний зарцуулалт багасаж, нүүрстөрөгчийн ялгарал буурч, иргэдийн амьдрах орчин сайжран, угсармал орон сууцны үнэлгээ өснө гэж мэргэжлийн хүмүүс үзэж байна.
