Их британийн ханхүү Харри “Spare” нэртэй дурсамж номоо хэвлүүлж шуугиан тарьснаас хойш хааны гэр бүлийн гишүүд олны өмнө ил гараагүй байсан. Тэгвэл хаан Чарльз болон Уильяам, Кэйт нар энэхүү дуулиан шуугианаас хойш анх удаа олон нийтийн арга хэмжээнд оролцжээ. Хаан Чарльз Абердинширт олон нийтийн бүлгийнхэнтэй уулзалт хийсэн бөгөөд энэ үеэр Харригийн ном таныг эмзэглүүлсэн үү гэж сэтгүүлч асуужээ. Хаан үүнд хариулалгүй машиндаа суун явсан бол Уильяам, Кэйт нарт ч сэтгүүлч ийм асуулт тавиад хариугаа авч чадаагүй байна. Уильяам, Кэйт нарыг Ливерпүүлийн шинэ эмнэлгийн нээлтэд оролцох үеэр сэтгүүлч “Та номын талаар юу гэж бодож байна? “ хэмээн мөн асуусан ч тэд юу ч хариулалгүй инээмсэглэн гараа даллаад яваад өгчээ.
Харригийн дурсамж ном хэвлэгдсэн эхний өдрөөс хойш цахим ном болон аудио форматаар 400,000 гаруй хувь борлогдож хамгийн хурдан борлогдсон уран зохиолын бус номоор тодроод байгаа билээ. Харри уг номондоо хааны гэр бүлийн гишүүдтэй харилцах харилцаа хандлагаа дэлгэж, ааваасаа Камиллатай битгий гэрлээч гэж гуйж байснаа илчилсэн юм.