Японы эрх баригчид Ерөнхий сайд асан Шинзо Абэгийн амийг хөнөөсөн хэрэгт буруутгагдаж буй этгээдийн сэтгэцийг сүүлийн таван сарын хугацаанд шалгаж байгаа. Хуулийн дагуу сэтгэцийн дүгнэлт гарсны дараа түүнийг шүүнэ гэж орон нутгийн хэвлэлүүд мэдээлээд байсан. Тэгвэл сэтгэцийн үнэлгээгээр 42 настай Тэцуя Ямагамиг сэтгэцийн хувьд яллагдагчаар татах боломжтой гэж үзсэн гэж Yomiuri Shimbun сонин мэдээлэв.
Прокурорууд түүнийг баасан гараг гэхэд яллана гэж Японы үндэсний телевиз NHK мэдээлсэн юм.
Абэ өнгөрсөн 7-р сард Нара хотод сонгуулийн сурталчилгааны үеэр үг хэлэх үеэрээ буудуулж нас барсан бөгөөд сэжигтэн Ямагами Абэг Эв нэгдлийн сүмтэй холбоотой гэж үзэн хорссон байдаг. Учир нь түүний ээж тус сүмд их хэмжээний мөнгө хандивлаж гэр бүлээ дампууруулсан гэж Ямагами үзжээ.
Албан ёсоор Дэлхийн энх тайван, нэгдлийн төлөөх гэр бүлийн холбоо гэгддэг тус сүм нь эмгэнэлт явдлын дараа гишүүд “хэт их” хандив өгөхөөс сэргийлнэ гэдгээ амласан юм.