Хойд Солонгос удирдагч өнгөрсөн 11 дүгээр сарын сүүлээр анх удаа охиноо олны өмнө гаргасан. Тодруулбал, Ким өнгөрсөн баасан гаригт охинтойгоо хөтлөлцөн пуужин хөөргөх үеэр гарч ирсэн нь дэлхийг цочирдуулсан гэж болно. Хувийн амьдралын талаар мэдээлэл нь хаалттай байдаг , олон нийтэд хуваалцсан аливаа мэдээллийг төрийн мэдлийн хэвлэл мэдээллийн хэрэгслүүд хатуу хянадаг тус улсын хувьд энэ нь маш гэнэтийн гайхам үйл явдал байв. Энэ нь Кимийн охиныг тус улсын хэвлэл мэдээллийн хэрэгслээр гаргасан анхны тохиолдол болсон бөгөөд Кимийн хүүхдүүдийнх нь зураг, бичлэг өмнө нь ил болж байгаагүй билээ.
Энэ үйл явдлаас хэдхэн хоногийн дараа цөмийн зэвсгийн чиглэлийн мэргэжилтнүүд, цэргүүдтэй уулзах уулзалтын үеэр Ким охины хамт дахин гарч ирсэн билээ. Кимийн хамгийн хайртай хүүхэд, ирээдүйн хойд солонгосын удирдагч гэх зэргээр олны анхааралд өртөж буй охиныг Ким Жу Ае гэдэг байна. Ким 2010, 2013, 2017 онд төрсөн гурван хүүхэдтэй. Ууган хүүхэд нь хүү, удаахь нь Ким Жу Ае бөгөөд бага хүүхэд нь охин гэсэн товчхон мэдээлэл бий.
Түүний анх удаа олон нийтэд ил гарсан хоёр тохиолдол нь Хойд Солонгосын үндэсний батлан хамгаалах чадавхи болох стратегийн цөмийн зэвсгийн тухай байсан нь санамсаргүй тохиолдол биш гэж үзэж буй хэсэг байгаа юм.
Өмнөх удирдагчдын түүхээс үзэхэд дээд удирдагчаар сонгогдохын тулд боловсрол, туршлага хэрэгтэй, 10 орчим жилийн дараа Жу Ае албан ёсны карьераа эхлүүлнэ байх гэж хойд Солонгосын талаар анализ мэдээлэл бэлтгэдэг “North Korea leadership watch” компанийн захирал Майкл Мадден мэдэгдсэн. Хойд Солонгосын улс төрийн соёлыг өөрчилж, эмэгтэй хүн залгамжлах нөхцөлийг бүрдүүлэхэд хангалттай хугацаа байгаа учир энэ боломжтой зүйл гэж Мадден үзэж байгаа юм.
Гэхдээ эрэгтэйчүүдийн эрх давамгайлсан тус улсад охиноо удирдагч болгох төлөвлөгөө гаргана гэж байж болшгүй зүйл. Жу Ае Кимийн хайртай хүүхэд нь байх гэж үзэх хэсэг ч байна.
Өмнөд Солонгосын зохиолч Чун Су Жин Хойд Солонгосын элитүүд ноён Кимийн охиныг удирдагчаар угтан авах магадлал бараг тэг гэж үзэж буйгаа илэрхийлээд тэднийг “Өөр хүйсийн удирдагч угтан авахад бэлэн биш байна” гэж үзэж буйгаа хэлэв. Тэрээр Ким зүгээр л пуужин харвадаг харгис дарангуйлагч бус хайрт аав гэдгээ харуулах тоглолт хийж байна гэж үзэж байгаа аж.
Ким охин Жу Ае болон цөмийн зэвсгийн эрдэмтэд, цэргүүдийн хамт буюу охины олон нийтэд ил болсон хоёр дахь тохиолдол
