Энэтхэгт гүүр нурж 135 хүн амиа алдсан харамсалтай хэрэг гарсан. Хамгийн хачирхалтай нь гүүрийг өнгөрсөн дөрөвдүгээр сараас эхлэн зургаан сарын хугацаанд сэргээн засварлаж аравдугаар сарын 26-нд нээгээд байсна юм. Нээлтийн үеэр албан хүмүүс ойрын 10 жилдээ засвар хийх шаардлагагүй тухай хэлж байв.
Уг хэрэгтэй холбогдуулан есөн хүнийг баривчлан шалгаж, таван хүний бүрэлдэхүүнтэй шалгах комисс байгуулаад байна. Засгийн газраас амиа алдсан хүмүүсийн гэр бүлд хүн тус бүрийн тоогоор 5 мянган ам.доллартай тэнцэх мөнгөн тэтгэлэг, гэмтсэн хүмүүст 600 ам.долларын тэтгэлэг олгожээ. Нэг гэр бүлийн долоон хүн амиа алдсан тохиолдол ч гарсан юм байна.
Тухайн гүүр нь 1900-аад оны үед Их Британийн колоничлолын үед баригдсан бөгөөд 230 метр урт, 1.25 метр өргөнтэй, жуулчдын хамгийн их очдог газрын нэг байв.
Ослын өмнөхөн идэр насны нэлээд хэдэн залуус гүүрэн дээр гарч, гүүрийг хоёр тийш савлуулж байсан нь дүрс бичлэгт үлдсэн байна.
Одоогоор гүүр нурсан нарийн шалтгаан тодорхой болоогүй ба шалгалтын ажиллагаа үргэлжилж байна.
