Монгол Улсад залуучуудын байгууллага үүсэн байгуулагдсаны 100, МҮБХ-ны 30 жилийн ойд зориулсан үндэсний бөхийн барилдаан болж өндөрлөлөө. Энэхүү барилдааны үеэр Улсын аварга Э.Оюунболдыг арслан цолтойгоор барилдуулах, сэргээшийн асуудалд орооцолдсон бөхчүүдийг хасах зэрэг маргаан хүчтэй өрнөв. Үүнээс болоод улсын аварга Э.Оюунболд улсын арслан Ц.Содномдоржийг гурвын даваанд амлан авч өвдөг шороодуулсан зэргээр ярих сонин ихтэй барилдаан байлаа.
Хүчит 512 бөхийн барилдаанд Ховд аймгийн Зэрэг сумын харьяат улсын харцага Баярхүүгийн Бат-Өлзий Төв аймгийн Борнуур сумын харьяат аймгийн арслан Э.Ууганбаяраар ес давж түрүүлж наадамчин олноо баясгалаа. Сонирхолтой нь, шөвгийн наймын дөрөв нь Ховд аймгийн бөхчүүд байв. Ховдын бөхчүүд 1940 оноос хойш наадмын түрүү аваагүй. Тйим учраас Б.Бат-Өлзий харцагын түрүүг онцгойлон авч үзэж, түүнд улсын арслан цол олгуулахаар хөөцөлдөж эхэлжээ. Цахим орчинд ч давлагаа хэдийнэ эхэлсэн байна.
