ШШГЕГ-ын 461 дүгээр хорих ангид авлигын хэргээр саатуулагдаж байсан шүүгч Л.Бямбаа өнгөрсөн сарын 24-нд нас барсан хэрэг гарсан. Түүний үхэл гаднын нөлөөтэй, бусдын гарт амиа алдсан байж болзошгүй гэж хэвлэл мэдээлэл болон ар гэрээс нь таамаглаж байсан. Тэгвэл одоогоор талийгаачийн үхэл гадны нөлөөтэй, эсвэл амиа хорлосон эсэхийг тогтоох шүүхийн шинжилгээний дүгнэлт гараагүй байгаа юм байна. Хэргийн газраас цуглуулсан эд мөрийн баримт болох гэрээслэлийг Шүүхийн шинжилгээний үндэсний хүрээлэнгийн шинжээч шалгаж байгаа аж.
Цагдаагийн байгууллагаас эд мөрийн баримтаар тус хорих ангийн камерын бичлэгийг бүрэн эхээр нь хуулж авсан бөгөөд бичлэгийг ар гэрийнхэнд нь үзүүлсэн байна.
