Алдарт дуучин Мэрайя Кэриг дуучны нөхөр асан, хөтлөгч Ник Кэннон 2015 онд сэтгэцийн өвчтэй хэмээн мэдэгдэж байсан. Тэгвэл энэ талаараа дуучин өөрөө ам нээлээ. Тэрээр “People” сэтгүүлийн ерөнхий редактор Жэсс Кэглтэй ярилцах үеэрээ “Би 2001 онд бие махбодийн болон сэтгэл санааны тавгүйтлийн улмаас эмнэлэгт хандахад, “сэтгэл цочирдлын хоёр туйлт эмгэг”-тэй гэж оношилсон ч үүнд итгэхийг огт хүсээгүй” гэжээ. Өнгөрсөн хугацаанд тэрбээр өвчнөө ялан дийлэхийн тулд тасралтгүй уран бүтээл хийж, завгүй ажилласанаа ч нуусангүй.
Тэрээр “Өвчнөө мартахад минь миний дуу, тайз болон фэнүүд минь тусалж байсан. Би эм уух болон эмчид үзүүлэхээс ч татгалзсаар ирлээ. Өвчин даамжирч, илүү хүнд шат руугаа орох вий гэхээс энэ бүхэн надад хэцүү санагддаг байсан. Их ч өвддөг байсан. Харин одоо энэ бүх сэтгэлийн зовиураас салахаар зориг шулуудсан. Одоо урт хугацааны эмчилгээ хийлгэнэ” гэж тэрээр ярьжээ.
