Татварын хөнгөлөлт, буцаан олголтыг дөрөвдүгээр сарын 20-ноос эхлэн иргэдийн дансанд шилжүүлж эхэллээ. Тус буцаан олголтыг жил бүр татвар төлөгчдийн тайлагналд үндэслэн олгодог. Энэ удаад ч мөн холбогдох хууль, журмын дагуу хэрэгжиж байгаа аж. Татварын байгууллагаас Төрийн сангаар дамжуулан Хувь хүний орлогын албан татварын тухай хуулийн 23 дугаар зүйлийн 23.3, 23.4, 23.5 дахь хэсэгт заасан хөнгөлөлтүүдийг иргэдэд олгож байгаа юм. Үүнд орон сууц худалдан авсан иргэдийн татварын буцаан олголт, мөн дотоод, гадаадын их, дээд сургуульд суралцагчдын сургалтын төлбөрийн хөнгөлөлт багтаж байна.
2026 онд нийт 28 мянга 879 татвар төлөгчид 57.1 тэрбум төгрөгийн хөнгөлөлт, буцаан олголт авах бөгөөд энэ нь өмнөх оноос тодорхой хэмжээгээр өссөн үзүүлэлт юм.
Тодруулбал:
- Анх удаа орон сууц худалдан авсан 7,527 иргэнд 28.4 тэрбум төгрөг,
- Давтан орон сууц худалдан авсан 10,742 иргэнд 18.5 тэрбум төгрөг,
- Сургалтын төлбөрийн хөнгөлөлтөд 11,397 иргэнд 10.1 тэрбум төгрөг,
- Бусад 12 иргэнд 29.8 сая төгрөгийг тус тус олгохоор байна.
Албаныхны мэдээлснээр буцаан олголтыг татвар төлөгчдийн бүртгэлтэй банкны дансанд үе шаттайгаар шилжүүлэх бөгөөд иргэд мэдээллээ үнэн зөв бүртгүүлсэн байх шаардлагатайг анхаарууллаа. Мөн буцаан олголттой холбоотой дэлгэрэнгүй мэдээллийг татварын албаны цахим систем болон харьяа нэгжүүдээс авах боломжтой юм.
