Дэлхийн хамгийн том газрын тосны компани болох Saudi Aramco-ийн Саудын Арабын зүүн бүсэд байрлах үйлдвэр өчигдөр Ираны дроны цохилтод өртжээ.
Дайралтын улмаас үылдьэрийн зарим хэсэгт дэлбэрэлт гарч, үйлдвэрийн үйл ажиллагааг түр зогсооход хүрсэн байна. Энэхүү байгууламж нь дангаараа дэлхийн газрын тосны нийлүүлэлтийн 7 хувийг бүрдүүлдэг тул зах зээлд нийлүүлэлтийн доголдол үүсэх өндөр эрсдэл бий болж байна
Мөн Ойрхи Дорнодын нефтийн экспортын “гол судас” болох Хормузын хоолойн тээвэрлэлтийн үйл ажиллагаа 70 гаруй хувиар зогсоод байна. Энэ чиглэлээр Хятад, Япон болон Өмнөд Солонгос зэрэг Азийн олон орнууд нефтийнхээ ихээхэн хэсгийг авдаг учраас нөхцөл байдал удаан үргэлжилбэл бүс нутаг төдийгүй дэлхийн хэмжээнд эрчим хүчний хомсдол гүнзгийрэх эрсдэлтэй юм.
Иранд мөргөлдөөн эхэлснээс хойш газрын тосны ханш 13 гаруй хувиар огцом өсөж, нэг баррель нь одоогоор $82 орчимд хүрээд байна. Шинжээчид хэрэв нийлүүлэлтийн энэхүү саатал удаан үргэлжилбэл ханш $100 болон түүнээс дээш өсөх бодит эрсдэлтэйг анхааруулж байна.
Саудын эрх баригчдын мэдээлснээр, хүний амь нас эрсдээгүй бөгөөд гэмтэж бэртсэн хүн байхгүй аж.
Уг халдлагыг Ирантай холбоотой бүлэглэл үйлдсэн байж болзошгүй талаар бүс нутгийн эх сурвалжууд мэдээлж байгаа ч Тегеран албан ёсны тайлбар хийгээгүй байна. Саудын тал нефтийн нийлүүлэлт хэвийн үргэлжилж байгаа бөгөөд дэлхийн зах зээлд нийлүүлэх экспортод ноцтой саад учраагүй гэж мэдэгдэв.
Ras Tanura нь өдөрт ойролцоогоор 500 мянга гаруй баррель нефть боловсруулах хүчин чадалтай, стратегийн ач холбогдол бүхий байгууламж юм.
