Гал түймрийн аюулыг сөрж яваад онцгой байдлын албаны 3 албан хаагч алтан амиа алдсан харамсалтай үйл явдал болсон. Тэднийг гэр бүл, хамтран ажиллагчсад нь өнөөдөр сүүлчийн замд нь үдлээ. Ерөнхийлөгч У.Хүрэлсүх салах ёс гүйцэтгэхэд оролцсон бөгөөд ар гэрийнхэнд нь эмгэнэл илэрхийлэв. Ингэхдээ албан үүргээ гүйцэтгэж яваад амь насаа алдсан алба хаагчдын нийгмийн баталгааг сайжруулах талаар хууль санаачлах эрхээрээ дамжуулан хууль санаачилна гэдгээ дуулгажээ.
Монгол Улсын Ерөнхийлөгч У.Хүрэлсүх албан үүргээ гүйцэтгэж яваад амь эрсэдсэн онцгой байдал, цагдаа, дотоодын цэрэг, хилийн цэргийн алба хаагчдын ар гэрт хамгийн бага хүүхдийг нь 18 нас хүртэл тухайн алба хаагчийн үндсэн цалинг нь олгож, гэр бүлд нь гурван өрөө байр өгдөг байх хуулийн төсөл санаачлан УИХ-ын хаврын чуулганд өргөн барихаар боллоо.
