Японы парламентийн төлөөлөгчдийн танхим 2023 оны батлан хамгаалах зардлаа өмнөх жилээс эрс нэмэгдүүлэн баталжээ. Уг төсвийг төлөөлөгчдийн танхим дахь улс төрийн сөрөг хүчин хүчтэй эсэргүүцсэн ч олонхийн саналаар хууль батлагдсан байна.
Хууль батлах өдөр парламентийн ордны гадаа Японы олон газраас иргэд эсэргүүцлээ илэрхийлж ,“Дайнд бэлтгэх, зэвсэглэлийн араас хөөцөлдсөн төсөв бидэнд хэрэггүй” “Зэвсэглэлд зориулах төсөв батлахыг эсэргүүцье” зэрэг уриа, лоозон барьсан иргэд цуглаж жагсаал хийжээ.
Японы батлан хамгаалахын зардлыг 2023 онд 6 их наяд 821 тэрбум 900 сая иен байхаар баталсан нь 2022 оны төсвөөс 1.26 дахин нэмэгдсэн тоо юм. Үүний зэрэгцээ батлан хамгаалах салбарыг бэхжүүлэхэд 3 их наяд 380 тэрбум 600 сая иен төсөвлөжээ.
