УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын гурван гишүүний бүрэн эрхийн асуудлыг өнөөдрийн УИХ-ын чуулганаар шийднэ. УИХ дахь МАН-ын бүлэг өчигдөр энэ асуудлыг хэлэлцээд Улсын ерөнхий прокурорын саналыг хүлээж авахаар шийдсэн. Өөрөөр хэлбэл, МАН-ынхан санал хураахгүйгээр прокурорын саналыг хүлээж авч, гурван гишүүнээ явуулахаар улс төрийн шийдвэр гаргасан юм.
УИХ дахь МАН-ын бүлгийн дарга Д.Тогтохсүрэнгийн танилцуулснаар МАН-ын бүлгийн хуралдаанд 61 гишүүнээс 46 нь оролцжээ. Бүлгийн хуралдаанд бүрэн эрхийн асуудал нь яригдаж буй гурван гишүүнээс хоёр нь буюу Н.Наранбаатар, Т.Аюурсайхан нар оролцож, байр сууриа илэрхийлсэн байна. Хуралдаанд оролцсон бүлгийн гишүүдийн дийлэнх олонх нь Халдашгүй байдлын дэд хорооны саналыг бүрэн дэмжсэн. Гишүүдийн холбогдсон хэрэгтэй танилцах эрхтэй байгууллага бол Халдашгүй байдлын дэд хороо. Тус хорооны гишүүд найман цаг гаруй хуралдаж, УЕП-ын саналыг дэмжсэн учраас МАН бүлэг улс төрийн шийдвэрээ гаргасан гэж МАН-ын бүлгийн шийдвэрийн талаар Д.Тогтохсүрэн тайлбарлав.
Нэгэнт МАН-ын бүлгийн шийдвэр ингэж гарсан тул өнөөдрийн чуулганаар дээрх гурван гишүүний бүрэн эрхийг түдгэлзүүлж чөлөөлөх асуудал ногоон гэрлээр шийдэгдэнэ гэж дүгнэхэд буруудахгүй.
