УИХ-ын гишүүн Ж.Сүхбаатар Ерөнхийлөгч У.Хүрэлсүхийн санаачилгаар хэрэгжүүлж буй “Эрүүл Монгол хүн” үндэсний хөдөлгөөнийхөнтэй хамтран Чингэлтэй дүүргийн Ерөнхий боловсролын 20 орчим сургуулийн удирдлагыг хүлээн авч уулзлаа. “Эрүүл Монгол хүн” хөтөлбөрийг боловсролын байгууллагын багш сурган хүмүүжүүлэгч, нийгмийн ажилтан, сэтгэл зүйч, хоол зүйч, тогооч, эцэг эх, сурагчдад таниулах, эрүүл мэндийн бүх шатны тусламжаар хангах нөхцөлийг бүрдүүлэх, хүүхдийг бүх насанд нь үзлэгийн цахим карттай болгох юм.
Чингэлтэй дүүргийн боловсролын бүх шатны байгууллагад энэ хөтөлбөр эхний ээлжинд хэрэгжиж, хүүхэд бүр эрүүл мэндийн үзлэгт хамрагдахаар болж байна. Энэ хөтөлбөр хэрэгжсэнээр хүүхдийнхээ эрүүл мэндийн нөхцөл байдлыг багш, сургууль нь үнэлдэг болохоос гадна цэцэрлэгийн наснаасаа эхлээд цахим карттай болох давуу тал бий болно. Сургуулийн хоол хүнс, хичээлийн хөтөлбөрөөр дамжуулан эрүүл монгол хүүхдийг төлөвшүүлэх нь хөтөлбөрийн зорилго юм.
Чингэлтэй дүүргээс сонгогдсон УИХ-ын гишүүн Ж.Сүхбаатар биеийн тамир, чийрэгжүүлэлтийн стандартад нийцсэн гадна талбайтай болгох, багш хөгжлийн төвүүдийг шинэчлэх, 100 ортой хүүхдийн цэцэрлэг барьж 2024 онд ашиглалтад оруулахад дэмжлэг үзүүлэн ажиллаж байна. Өрхийн эрүүл мэндийн төвүүдийн тоног төхөөрөмжийг ирэх 4 дүгээр сард хүлээлгэн өгнө. Чингэлтэйчүүд олон улсын стандартад нийцсэн тоног төхөөрөмж бүхий оношилгооны төвөөр тун удахгүй үйлчлүүлнэ.
