Их аварга М.Даваажаргал зодог тайлахаар болжээ

Бэртэл гэмтлээс болж тэмцээн өнжөөд байгаа Ёкозүна Хакүхо М.Даваажаргал зодог тайлахаар шийдсэн тухай эх сурвалжууд мэдээлж эхэлжээ. Өдгөө 36 настай түүний баруун өвдөгний бэртэл гүйцэд эдгэхгүй байгаа учир ийм шийдвэр гаргах болсон байж магадгүй ажээ. Их аваргын хувьд энэ жил Нагоя башёд 15 даваатай нэг ч унаагүй түрүүлж, 45 дахь түрүүгээ хүртэн өөрийн тогтоосон дээд амжилтаа шинэчилсэн. Дэвжээ эзэмших хүсэлтэй Хакүхо 2019 онд Японы иргэн болж байв. Түүнчлэн Токиогийн олимпод сүмогийн их аваргын ёсолгоо хийх хүсэлтэйгээ хэлж, тэр болтол тэвчинэ гэдгээ зарлаж байсан. Хакүхо 2007 онд ёкозүна цол хүртэж, дээд макүүчи зиндаанд нийт 45 түрүү хүртэж, 1187 даваа авч 14 жилийн турш Японы мэргэжлийн сүмог эзэгнэсэн домогт аварга юм. Түүний тогтоосон маш олон дээд амжилтыг эвдэх хүн гарна гэдэгт мэргэжилтнүүд эргэлздэг. Юутай ч их аварга М.Даваажаргал зодог тайлж магадгүй болж, энэ талаар ойрын үед мэдэгдэл хийх нь ээ.