Ерөнхийлөгчийн сонгуулийн өмнө МАН, МАХН хоёр нэгдэж байгаагаа зарлаж, хүзүү сээрээрээ нийлэлдэж баахан давхисан. Тухайн үед улс орныхоо эрх ашгийн төлөө нэгдэж байна гэх мэтчилэн уран гоё тайлбарласан ч С.Ганбаатарыг Ерөнхийлөгчид нэр дэвшүүлэх боломжийг хаах, МАН-даа гомдоод 10 жил лааз өшиглөсөн МАХН-ынханд албан тушаал өгөх тохироог ханцуй дотроо хийснийг олон нийт гадарлаагүй. Одоо л энэ бүхэн тодорхой болж байна.
Ерөнхийлөгчийн сонгуулийн дараа МАХН-ын дарга байсан Н.Энхбаяр Стратеги судлалын хүрээлэнгийн захирал болж анхны бялуугаа хүртэв. Араас нь хотын даргын хоёр орлогч, нийслэлийн 5 агентлагийг МАХН-д өгөх ёстой байсан ч Д.Сумъяабазар тас гэдийчихсэн. Эх сурвалжуудын өгүүлснээр МАХН-ынхан хотын даргын орлогчийн хоёр суудал, нийслэлийн мэргэжлийн хяналт, хот төлөвлөлт, Ус суваг, байгаль орчны газар гэх мэт 5 том агентлаг, газрыг авна гэж зүтгэжээ.
Санаж байвал МАН, МАХН хоёр нэгдэхдээ санамж бичиг байгуулаад байсан нь албан тушаалыг 70:30 гэсэн харьцаатайгаар хуваах тухай тохиролцоог цаасан дээр буулгасан байж. Гэхдээ сонгуулийн дараа МАН энэ тохиролцооноосоо сурсан зангаараа унжсан. МАХН-ынхан Тусгаар тогтнолын ордонд өдөр бүр албан тушаал нэхээстэй. Аргаа барахдаа Сонгинохайрхан дүүрэгт болох УИХ-ын нөхөн сонгуульд намынхаа гишүүдийн хүслийг тас цохиж орхиод Н.Энхбаярын хүү Э.Батшугарыг нэр дэвшүүлж суух вэ. Угсаа залгамжлуулах тохиролцоог угаасаа Ерөнхийлөгчийн сонгуулийн өмнө хийчихсэн.
МАХН-ынхан амласан албан тушаалуудаа өгөхгүй бол МАН-аас буцаад гарна гэчихсэн гүйлдэж яваа дуулдсан. Гэвч нэгэнт хожимдсон. Өөрсдийнх нь хүсэлтээр Дээд шүүх МАХН-ыг татан буугдсанаар бүртгэчихсэн. Одоо өөр нэртэй нам байгуулдаггүй л юм бол МАХН нэрийг ашиглах боломжгүй.
