Монгол Улсын соёлын гавьяат зүтгэлтэн, орчуулагч, сэтгүүлч Ж.Нэргүй Егор Фёдорович Тимковскийн “1820-1821 Монгол” нэртэй номыг орчуулан өнгөрсөн жил уншигчдын гар дээр тавьсан. Уншигч, судлаачдаас маш өндөр үнэлгээ авсан энэхүү номыг “MNC” телевизээс “Шороон гахай жилийн шилдэг ном”-ын нэгээр шалгаруулжээ. Өргөмжлөлийг Ж.Нэргүй гавьяатад өнөөдөр гардуулан өгсөн байна.
Тимковский нь 1820 оны намар Хүрээгээр дайран урагшаа, 1821 оны зун мөн Хүрээг дайран хойшоо гарах хугацаандаа тухайн үеийн Монгол орны эдийн засаг, нийгмийн бүх л салбарт хийсэн ажиглалтаа дэлгэрэнгүй тэмдэглэн үлдээсэн байдаг.
Ингэхдээ угсаатны зүй, хэл соёл, цэрэг цуух, Хиагтаас Бээжин хүрэх бүх өртөөг нарийвчлан тодорхойлж, уншигчдад зориулсан задгай, энгийн бичлэгтэй, Монгол нутаг, монголчуудад гүн хүндэтгэлтэй ханддаг сэтгэл нэвт шингэсэн, адал явдалт зохиолын хэмжээний аян замын тэмдэглэл туурвисан юм.
