13 дугаар зуунд баригдсан, 850 жилийн настай Готик хэв маягийн Католик сүм Нотр Дам буюу Парисын дарь эхийн сүмийн зарим хэсэг түймэрт өртсөн нь Францчуудыг ихээхэн цочирдуулсан. Нотр Дам бол бидний түүх төдийгүй дэлхийн ч түүхийг өгүүлэх хосгүй үнэт өв хэмээн тэд харамсан өгүүлж буй юм. Францын тэргүүн баячууд тус сүмийн сэргээн засалтад эхнээсээ хандив өгч эхэлжээ.
Тухайлбал, Францын тэрбумтан, “Gucci”,”Yves Saint Laurent” зэрэг брэндүүд үйлдвэрлэдэг “Kering” группын эзэн Франкойз Хэнри Пинаулт 100 сая еврог сүмийн сэргээн засалтад зориулан хандивлахаа твиттерээр мэдэгдлээ. Тэрээр жүжигчин Сальма Хаекын нөхөр юм.
Мөн “Dior” зэрэг тансаг зэрэглэлийн бүтээгдэхүүн үйлдвэрлэдэг LVMH группын эзэн Bernard Arnault 200 сая евро хандивлахаар болсон байна.
