Солонгосын агаарын тээврийн хоёрдогч томоохон компани болох “Asiana Airlines” Сөүл-Улаанбаатарын чиглэлд ирэх 3-р сарын сүүлчээс эхлэн шинээр нислэг үйлдэхээр болсон талаар бид өмнө нь мэдээлж байсан.
30 шахам жил үргэлжилсэн “Korean air” компанийн монопольчлол үүгээр дуусч, хамгийн гол нь нислэгийн тийзний үнэ буурах байх гэсэн хүлээлт одоо байгаа. “Asiana Airlines” компанийн хувьд “Korean air”-ийн дараа жагсах БНСУ-ын агаарын тээврийн том, нэр хүндтэй компани. Нислэгийн тийзийн үнэ нь тийм ч хямд бус байдаг учир тус компанийг Jeju Air, Eastar Jet гэсэн хоёр жижиг авиа компанитай өрсөлдөн сонгон шалгаруулалтад ялахад тийзийн үнийг тийм ч сайн буулгахгүй байж магад гэж эргэлзэх хэсэг ч байсан. Тэгвэл “Asiana Airlines”-ынхан одоогийн тийзний үнийг 45 хувь бууруулна хэмээн мэдэгджээ. Тэд 277 суудал бүхий A330 онгоцоор долоо хоногт 3 удаа, нийт 833 суудлын нийслэгтэйгээр даваа, лхагва, бямба гарагт нислэг үйлдэхээр төлөвлөөд байгаа юм байна.
Чингис хаан олон улсын нисэх буудлын хүчин чадлаас хамаарч A330 онгоцыг сонгосон бөгөөд Улаанбаатар хот шинэ нисэх буудлаа ашиглалтад оруулсны дараа B777 (338 суудал), B747 (404 суудал) зэрэг томоохон хэмжээний агаарын хөлгийг нэвтрүүлэхээр төлөвлөж байгаагаа “Asiana Airlines”-аас мэдээлжээ.
