Жолооны үнэмлэхний эрх сэргээнэ, ангилал ахиулна, жолооч болгоно, зөрчлийн оноог нэмж өгнө гэж төрийн байгууллагын ажлыг хувиараа хийдэг мэтээр бусдад итгүүлж, залилангийн гэмт хэрэг үйлдсэн этгээдүүдийг илрүүлэн шалгаж байна. Өөрсдийгөө оюутан гэж танилцуулсан 20-21 насны хоёр этгээд одоогийн байдлаар 60-70 удаа бусдыг залилж, амар хялбар аргаар мөнгө олох арга хэрэгсэл болгон гэмт хэрэг үйлдснээ хүлээгээд байна.
Тэд сошиал группуудээр жолооны үнэмлэхний эрх сэргээнэ, ангилал ахиулна гэж хуурамч хаяг ашиглан зар тарааж, сонирхсон иргэдтэй чаатаар холбогдон нэг хүнээс 70-100 мянган төгрөг дансаар авч залилжээ. Залилсан мөнгөө пс тоглох зэргээр үрсэн гэдгээ байцаалтын явцад мэдүүлсэн байна. Иймэрхүү байдлаар залилуулсан иргэд байвал Баянзүрх дүүргийн цагдаагийн II хэлтэст хандаж болох юм байна.
Энэ мэтчилэн хуурамч хаяг ашиглан фэйсбүүкээр зар тавьж залилах төрлийн гэмт хэрэг буурахгүй байгаа тул иргэдийг сэрэмжтэй байхыг Цагдаагийн байгууллагаас анхаарууллаа.
