…анхны дурлал, Ганхуягийг анх олж харсан халуухан мөч, анхны тоглолт, анхны шагнал…амиа хорлохоор шийдсэн гашуун өдөр…СУИС-ын оюутан Сараа…найман боодол демадрол…тэвчээр…анхны хүүхдээ төрүүлэхгүй байх шийдвэр…салалт…анхны CD, дахиад л хайр…Болдхуяг…дурласан Сараа…нулимс, эргэлзээ, итгэл…хагацал гуниг, аз жаргал…Мэдээж “Зууны дуу хоолой-Би Сараа” намтар зохиолыг бичих гэж би түүний сэтгэлийн нугачаа бүрийг хөндсөн, зүрхнийх нь аялгуу бүрийг анирдсан, давуу болон сул талуудыг нь тэмтэчсэн…үүний тулд шарыг нь малтсан, хатуурхсан, аргадсан…тэгээд найз маань нэгэнт туулсан амьдралаа дахин туулах болгондоо яг тэр үеийн зовлон жаргалаараа дахин амьсгалж, амьдарч, шархалж, жаргаж буйг хараад өөртөө багахан гэмшсэн. Сараа үнэхээр илэн далангүй байж чадсан. Үүнийг ямар ч эмэгтэй чадахгүй, зориглохгүй…
Зохиолч сэтгүүлч Р.Эмүжин дуучин Б.Сарантуяагийн намтар, түүхийг хүүрнэсэн “Зууны дуу хоолой-Би Сараа” номынхоо талаар өөрийн нүүр номдоо бичихдээ дээрхийг зураглажээ. Энэ номонд Сараагийн дотны найздаа ч харамлаад яримгүй тийм л нүцгэн үнэнүүд багтсан гэнэ. Тиймээс ч тэд номоо номын худалдаагаар борлуулахгүй гэнэ. Учир дуучин Сараа маань олон нийтэд дэлгэсэн амьдралын нууцуудаа худалдахыг хүсээгүй бололтой. Гэхдээ та Сараагийн туулсан амьдралын зөргөөр түүнтэй хамт алхахыг хүсвэл зөвхөн түүний Дуучин Б.Сарантуяа пэйж хуудсаар дамжуулан сэмхэн захиалж болно гэсэн шүү. Зохиолчийнх нь хэлснээр ном биш Зууны манлай дуучин, хатагтай Б. Сарантуяагийн зүрхний бичээс, сэтгэлийн долгион, тархины бичлэг гэж тодорхойлсон энэ бүтээлд түүний туулсан жаргал зовлон, алдаа оноо…өнгө дүрс, өгөө аваа, нулимс, инээмсэглэлтэйгээ, бас цаг үетэйгээ бий гэнэ лээ.
