Монгол Улс, Бүгд Найрамдах Франц Улсын хооронд дипломат харилцаа тогтоосны 60 жилийн ойг тэмдэглэн өнгөрүүлэх хүрээнд зохион байгуулж байгаа “Нисдэг тэргээр эмнэлгийн яаралтай тусламж үзүүлэх сургалт” эхэллээ. Энэ удаагийн сургалтад Эрүүл мэндийн яам, улсын томоохон эмнэлгүүд, Зэвсэгт хүчний Агаарын цэргийн командлал, Хил хамгаалах ерөнхий газар, ОБЕГ-ын харьяа анги, нэгжүүд, хувийн хэвшлийн төлөөлөл зэрэг 100 гаруй алба хаагч, мэргэжилтэн оролцож байна. Агаараас эрэн хайх, аврах анги өнөөдрийн байдлаар 159 удаагийн дуудлагаар ажиллаж, нийт 212 иргэний амь насыг авран хамгаалжээ.
ФРАНЦЫН ТҮРГЭН ТУСЛАМЖИЙН ЭМЧ САНДРА ЛАТЕЛМЕ:
–Би Бүгд Найрамдах Франц улсад эмнэлгийн түргэн тусламжийн эмчээр тасралтгүй 25 жил ажиллаж байна. Францдаа нисдэг тэргээр уулнаас аврах, тусламж үзүүлэх чиглэлээр мэргэшсэн эмч юм. Монгол Улсын онцгой байдлын 111-р ангитай хамтран 3 дахь жилдээ ажиллаж байна. Монголд энэ сургалтыг эхлүүлэх санаачилга гарган, өнөөдрөөс бодит ажил хэрэг болгож байгаад баяртай байна. Энэхүү сургалтаараа бид чаддаг бүхнээ монгол эмч нарт заах болно гэлээ. 
