НИТХ-ын хуралдаанаар Метроны ТЭЗҮ-ийг дэмжлээ

НИТХ-ын өнөөдрийн (2025.03.25) ээлжит бус хуралдаанд Нийслэлийн Засаг даргын орлогч Л.Хосбаяр шинэчлэн боловсруулсан Техник эдийн засгийн үндэслэл /ТЭЗҮ/-ийг танилцуулсан юм. Тус төслийн ТЭЗҮ-ийг зөвлөх үйлчилгээний гүйцэтгэгчээр шалгарсан БНСУ-ын Dohwa Engineering Co.Ltd болон “Korea National Railway”, “Soosung Engineering”, “Korea Railroad Corporation” түншлэл хамтран боловсруулсан бөгөөд 2013 оны Жайкагийн гаргасан төслөөс эрс шинэчлэгдсэн гэдгийг ажлын албанаас тодотгов. Өөрөөр хэлбэл, 10 жилийн өмнөх Улаанбаатар хотын дэд бүтэц, хот төлөвлөлт болон инфляци, үнийн өөрчлөлт зэрэг цогц асуудлыг шинэчилсэн ТЭЗҮ-д тусгасан байна. Тухайлбал, геотехник, гидрогеологи, байгаль орчны төлөв байдлын үнэлгээ, зорчигч хөдөлгөөний судалгаа, тээврийн эрэлт зэрэг нийт зургаан суурь судалгааны ажлыг хийж гүйцэтгэжээ. Мөн Улаанбаатар Метроны ТЭЗҮ-ийг Шинжлэх ухаан технологийн мэргэжлийн зөвлөлүүдээр үе шаттай хэлэлцэх үеэр нийт 163 санал гарсан бөгөөд 87 саналыг нь ТЭЗҮ-д тусгаад байна.