Автотээврийн Үндэсний Төвийн оношлогоо, бүртгэлийн бүх цэгүүдэд RFID наалтын хувьд ямар нэгэн төлбөр хураамжгүй нааж, дараалал ч нэлээд үүсээд байгаа. Учир нь олон нийтийн мэдээллийн хэрэгслээр тээврийн хэрэгслийн цахим гэрчилгээ буюу RFID tag-ийг 2024.01.01 хүртэл үнэ төлбөргүй наана. 01 сарын 01-ээс төлбөр хураамж авна гэсэн мэдээлэл тархсан юм. Тэгвэл төлбөр авна гэдэг ташаа мэдээ, цахим гэрчилгээг анх удаа авахад иргэнээс төлбөр хураамж авахгүйгээр олгож байгаа гэж Автотээврийн Үндэсний Төвөөс анхаарууллаа.
Цахим гэрчилгээ /RFID tag/-г та техникийн хяналтын үзлэгт орох хугацаа болоогүй тохиолдолд оочир дараалал үүсгэхгүй шууд инженерт хандаж наалгаж болох юм байна.
Энэхүү наалт нь тухайн тээврийн хэрэгслийн улсын дугаар, марк төрөл, өнгө, өмчлөгчийн утасны дугаар болон Оношлогоо, татвар, торгууль, даатгал гэсэн ерөнхий мэдээллийг агуулсан, уулзвар гарцууд дээрх суурилуулсан камерт уншихдаа зөрчилтэй эсэх мэдээллийг тодорхойлон дамжуулах ТАГ юм.
Банкныхаа апп ашиглан татвар торгуулиа төлөөд оношлогооны хугацаа нь дууссан бол ороод, очер дараалал багатай өөрт аль ойрхон цэг дээр очоод RFID наалгаарай.
