Хонконгт энэ сарын 25-26-ны өдрүүдэд жүдо бөхийн Азийн нээлттэй тэмцээн боллоо. Тус тэмцээнд 24 улсын нийт 131 жүдоч өрсөлдсөн бөгөөд Монгол Улсаа төлөөлөн Э.Сумъяабазар, Ө.Пэрэнлэйжамц нар оролцжээ. Тэмцээний -60 кг-д Э.Сумъяабазар алтан медаль, +100 кг-д Ө.Пэрэнлэйжамц хүрэл хүртэв. Ө.Пэрэнлэйжамц нь дархан аварга Г.Өсөхбаярын хүү бөгөөд 18 хүртэлх насны 3х3 сагсан бөмбөгийн дэлхийн аваргад эх орноо төлөөлөн оролцож байсан удаатай.
Монгол улсын шигшээ багийн тамирчид арваннэгдүгээр сарын 11-нээс Япон улсад тэмцээний өмнөх хамтарсан бэлтгэлээ эхлүүлсэн. Кокушикан их сургуульд эрэгтэй шигшээ баг, Нихон их сургуульд эмэгтэй шигшээ баг бэлтгэлд хамрагдсан. Эрэгтэй, эмэгтэй шигшээ багийнхан өнгөрөгч долоо хоногоос Токай их сургуульд хамтарсан бэлтгэлд хамрагдаж эхэлжээ.
