Налайх дүүргийн нутаг дэвсгэрт аюултай хог хаягдлыг дахин боловсруулах чиглэлээр үйл ажиллагаа явуулдаг нэгэн аж ахуй нэгж хог хаягдлаа бохирын төв магистраль шугамд хаяснаас нийслэлчүүд хорт хийгээр амьсгалсан тохиолдол өнгөрсөн сард гарсан. Тэгвэл Орчны бохирдлыг бууруулах үндэсний хорооноос аюултай хог хаягдлын менежментийг сайжруулахтай холбоотойгоор хийж буй ажлыг тодрууллаа.
Орчны бохирдлыг бууруулах үндэсний хорооноос аюултай хог хаягдлыг түр хадгалах агуулах барих ажлыг 15 аймаг болон Нийслэлийн Баянзүрх дүүрэг дэх Цагаан давааны хогийн цэгт 2020 оноос эхлэн үе шаттайгаар хэрэгжүүлж байгаа ажээ. Өнөөдрийн байдлаар ашиглалтад орсон болон улсын комист хүлээлгэн өгөхөөр хүлээж байгаа нийт 9 аймгийн төвийн барилга байна.
Цаашдаа эдгээр агуулахуудын ашиглалт, үйл ажиллагааны менежментийг Аюултай хог хаягдлыг түр хадгалах, цуглуулах, тээвэрлэх, дахин боловсруулах, устгах тусгай зөвшөөрөлтэй мэргэжлийн хувийн аж ахуй нэгжтэй хамтран хэрэгжүүлэх боломжийг судалж байна гэж Орчны бохирдлыг бууруулах үндэсний хорооноос мэдээллээ.
