Монголын Сууц Өмчлөгчдийн Холбоодын Дээд Зөвлөл нь гишүүддээ үйлчилдэг төрийн бус байгууллага бөгөөд Монгол улсын хэмжээнд үйл ажиллагаа явуулж буй 1623 холбоодын 1050 Сууц өмчлөгчдийн холбоодыг эгнээндээ нэгтгэн тэдгээр Сууц Өмчлөгчдийн Холбоо болон иргэд оршин суугчдын эрх ашгийг хамгаалах, өдөр тутмын болон санхүүгийн үйл ажиллагаанд хяналт тавих, зөвлөн туслах, төр хувийн хэвшлийн хамтын ажиллагааг бэхжүүлэх чиг үүрэгтэйгээр 24 дэх жилдээ ажиллаж байна.
Тус газраас “Таньд тусалъя” нээлттэй хаалганы өдөрлөгийг зохион байгууллаа.
Энэхүү арга хэмжээний үеэр Сууц өмчлөгчдийн холбоодын үйл ажиллагааг сурталчилж, харилцан туршлага солилцож, иргэд оршин суугчдад зөвлөгөө мэдээлэл өгөв.
Сууц Өмчлөгчдийн Холбоодын Дээд Зөвлөлөөс 2020 оноос Сууц өмчлөгчдийн холбоодын үйл ажиллагаа болон санхүүгийн үйл ажиллагааг иргэд оршин суугчдад ил тод нээлттэй болгох үүднээс “Шилэн СӨХ” платформыг мэргэжлийн байгууллагуудаар боловсруулсан ба өдгөө уг платформыг 500 гаруй СӨХ бүрэн, бусад нь нэвтрүүлэх шатандаа явж байна. Мөн Нийслэлийн захирагчийн ажлын албатай хамтарч “UB engineering цахим бүртгэлийн цогц системийг боловсруулан Сууц өмчлөгчдийн холбоодын бүртгэл болон дундын өмчлөлийн эд хөрөнгийн бүртгэлийг цахимжуулах ажлуудыг эхлүүлжээ. Цаашид Сууц өмчлөгчдийн холбоодын үйл ажиллагаанд түвшин тогтоох үзлэгийг зохион байгуулахаар төлөвлөсөн байна.
