Улсын аварга С.Мөнхбат “Альфа медикал” нэртэй спортын сэргээн засах төв байгуулжээ. Иргэд болон тамирчид гэмтлийн мэс засалд орсны дараа нөхөн сэргээх эмчилгээ хийлгэх зориулалттай бөгөөд Япон улсын мэргэжилтнүүд бариа засал, хөдөлгөөн заслын эмчилгээ хийж, үйлчлүүлэгчээ хүлээн авч эхэлсэн байна. Тэрбээр “Сүүлийн жилүүдэд барилдааныхаа бэлтгэлийг багасгаж, спортын чиглэлд ажлууд хийх болсон. Үүний хамгийн том ажил нь Монголдоо спортын сэргээн засах эмнэлгийг байгуулах байсан.
Тэр мөрөөдлийн дагуу эмнэлэг байгуулан ажиллаж байна. Монголд сэргээн засах эмчилгээний салбар дутмаг хөгжиж, хүмүүсийн ойлголт бага байдаг. Манай тамирчид бэртэл гэмтлээ хурдан эдгээж, бэлтгэлээ үргэлжлүүлэх шаардлагатай. Миний бие үндэсний бөхөөр барилдаж байх хугацаандаа маш олон гэмтэл авч, цаг хугацаа алдсан. Эмчилгээ үр дүнгүй байснаар гэмтэл сэдэрдэг учраас өөрийн биеэр эмнэлэг байгуулж, тамирчдын ирээдүйд хувь нэмрээ оруулж байна. Иргэдийг зөв амьдралын хэв маягт уриалж, эргээд ажил мэргэжилд нь хэвийн оруулах зорилготой” гэсэн юм.
