Баасан гарагт Голландын шүүх дэлхий даяар 500-600 хүүхдийн эцэг болсон, эр эсийн донор залууг бэлгийн эс хандивлахаа зогсоохыг үүрэг болгожээ. 41 настай Голланд эрийг үрийн шингэн өгөхийг хориглож, зөрчсөн тохиолдолд 100,000 евро буюу 110,000 доллараар торгохоор шийдсэн байна.
Шүүхээс мөн түүнийг гадаадад байгаа эмнэлгүүдэд хадгалуулсан эр бэлгийн эсүүдээ устгуулахыг үүрэг болгожээ.
Донор авч хүүхэдтэй болсон эцэг эхийн төлөөллүүд болох Голландын эцэг эхчүүдийн эрх ашгийг төлөөлсөн сангаас гомдол гаргасны дагуу шүүх хурлыг явуулсан бөгөөд . тэд энэ хүний үргэлжлүүлэн эр бэлгийн эсээ хандивлах нь хүүхдүүдийн хувийн амьдралын эрхийг зөрчинө гэж үзжээ. Ирээдүйд хоорондоо хайр дурлалын харилцаа тогтоох, санамсаргүйгээр цус ойртолт олох магадлалтай гэж үзсэн байна.
Голланд залуугийн эр бэлгийн эсийн их хэмжээний хандив анх 2017 онд ил болсон бөгөөд тэрээр энэ үед аль хэдийн 100 гаруй хүүхэдийн эцэг болсон байсан тул Голландын эмнэлгүүдэд донор болохыг хориглосон аж.
Гэвч тэрээр гадаадад, тэр дундаа олон улсад үйл ажиллагаа явуулдаг Данийн эр бэлгийн эсийн Cryos банкинд хандив өргөсөөр байв. Мөн эр бэлгийн эсийн донор хайдаг сайтууд дээр өөрийгөө донороор авахыг санал болгосоор байсан бөгөөд заримдаа өөр нэр ашигладаг байжээ.
