Ус сувгийн удирдах газар 2018 оноос эхлэн цэвэр усны шугам сүлжээг засварлах, шинэчлэх ажилд шуудуу ухалгүйгээр шугам хоолойг доторлох технологийг нэвтрүүлсэн нь олны талархлыг хүлээсэн тун амжилттай ажлуудын нэг болсон. Богино хугацаанд хийгддэг, замын хөдөлгөөнийг хаадаггүй, зардал болон нөхөн сэргээлтийн ажил бага гээд уг технологи олон давуу талтай. Тэгвэл энэ дэвшилтэт технологиор 2018-2022 онд нягтрал хөдөлгөөн ихтэй, насжилт өндөр нийт 13,77 км шугамыг УСУГ-аас доторложээ. Харин энэ онд 5км орчим шугамыг доторлохоор төлөвлөсөн байна. Манай улсын хувьд шугам доторлогооны ажлыг анх Австри улсын “Ар Ти Ай” компанитай гэрээ байгуулж, Австри Монгол Улсын хооронд байгуулсан хөнгөлттэй зээлээр машин механизм, багаж хэрэгслэл, материал тоног төхөөрөмжийг авч хийж эхэлсэн түүхтэй.
Улаанбаатар хотын цэвэр, бохир усны шугам сүлжээг анх 1950-иад онд ашиглалтад оруулсан бөгөөд эхний шугам сүлжээнүүд дал шахам жилийн насжилттай болоод байгаа билээ. Сүвлэж, шинэчилсэн шугам нь хамгийн багадаа 60 жил, цаашлаад 100 жилийн баталгаатай ажиллана гэж УСУГ-ын инженерүүд хэлдэг.
