Сэтгүүл зүйн чиглэлээр суралцаж буй оюутнуудыг өөрийгөө хөгжүүлэхэд дэмжих, сэтгэн бодох, бичих ур чадварыг нь нээх зорилгоор “Сэтгүүлч Батдорж” сангаас жил бүр эсээ бичлэгийн уралдаан зарладаг. Энэ жил тус сангаас 10 дахь удаагийн уралдаанаа Монголын үндэсний сэтгүүл зүйн 110 жилийн ойн өдрөөр уламжлал ёсоор зарлалаа. Энэхүү урадаанд түрүүлсэн оюутанд сургалтын бүтэн жилийн төлбөрийг тэтгэлэг болгон олгодог юм.
Уралдаанд их, дээд сургуульд сэтгүүл зүйн чиглэлээр суралцаж буй хоёр, гуравдугаар дамжааны оюутнууд оролцох боломжтой бөгөөд эхний шатанд “Нүүх үү, үлдэх үү?” сэдвээр эсээ бичиж өрсөлдөх бол хоёрдугаар шатанд телевизийн сурвалжилга бэлтгэх юм байна. “Сэтгүүлч Батдорж” сангийн нэрэмжит уралдааны ялагчид Дэлхийн хэвлэлийн эрх чөлөөний өдөр буюу тавдугаар сарын 3-ны өдөр тодорно. Уралдааны удирдамжийг хавсаргав.
